Француското ротирачко претседателство е подготвено да ги вклучи барањата на Бугарија во преговарачката рамка за Македонија и ЕУ да стане гарант за нивната имплементација, пишува „Медиапул.бг“, повикувајќи се на извори на дипломати.
Се очекува предлогот да биде одобрен од другите земји-членки и покрај резервите дека билатералните прашања се пренесуваат на европско ниво, пишува сајтот.
Според претходно најавените информации предлогот ќе биде доставен во бугарскиот парламент. До вторник следната недела, за кога е закажан Советот за општи работи, Бугарија ќе треба да се произнесе за францускиот предлог, а два дена подоцна почнува состанокот на лидерите на ЕУ.
Македонскиот претседател, Стево Пендаровски, претходно денеска по средбата со претседателот на Европскиот совет, Шарл Мишел изјави: „Во Скопје не сме го виделе францускиот предлог“.
Мишел, пак, од своја страна рече дека е уверен оти наскоро ќе има позитивен развој на настаните.
„Ги поддржуваме сите напори да се најде заедничко прифатливо решение за отвореното билатерално прашање со Бугарија. Јас сум навистина вклучен со Франција и ЕУ да помогнеме да се придвижи овој процес нанапред и убеден сум дека ќе имаме позитивен развој многу брзо“, рече Мишел на заедничката прес-конференција со претседателот Стево Пендаровски.