Битола, 17 март 2020 (МИА) – Универзитетот „Св. Климент Охридски“-Битола подготви посебен план на активности за одржување на е-настава во текот на кризната ситуација со цел да се заштити здравјето на студентите и вработените.
Од УКЛО-Битола информираат дека ректорскиот колегиум одлучил да продолжат сите активности поврзани со наставата по електронски пат.
Според утврдените заклучоци, студентите ќе продолжат со настава преку on-line предавања, во согласност со распоредот за настава, со користење на платформите преку uklo.edu.mk доменот, одржување настава врз принципот далечинско учење и електронска комуникација и други е-мерки кои се однесуваат подеднакво на сите студентите од прв, втор и трет циклус на студии.
УКЛО е во постојана комуникација со Националната агенција за европски образовни програми и мобилност како и со партнерските странски универзитети во рамките на Ерзмус + програмата.
Активностите на УКЛО во однос на работењето на Ректорската управа и Сенатот ќе се одвиваат редовно, преку е-седници и постојана електронска комуникација со професорите и студентите, се нагласува во соопштението од Универзитетот „Св. Климент Охридски“-Битола. мт/вг/
