Најмалку три ракети беа истрелани денеска во Кабул, пред говорот на претседателот на Авганистан, Ашраф Гани, а по повод почетокот на муслиманскиот празник Курбан Бајрам.
Досега никој не презеде одговорност за нападот. Ова беа првите ракети што паднаа врз авганистанскиот главен град откако талибанците почнаа серија офанзиви за време на повлекувањето на странските трупи од оваа земја.
Утринскиот празничен мир во Кабул беше нарушен од звукот на влезните проектили што се слушаа низ Зелената зона, во која се сместени претседателската палата и неколку амбасади, вклучувајќи ја и американската дипломатска мисија.
Ракетите погодија три различни делови – изјави портпаролот на Министерството за внатрешни работи, Мирвас Станикзај и додаде дека ракетите најверојатно биле испукани од пикап возило.
Неколку минути по нападот, Гани започна да се обраќа на нацијата во присуство на неколку други службеници.
Претседателот и другите во близина мораа да престанат да се молат откако неколку силни експлозии ја потресоа областа.
