Велес, 14 март 2020 (МИА) – Општина Чашка неделава почна со изградба на новиот мост на реката Тополка кај село Дреново. Мостот ќе биде долг 10 метри и широк шест метри, а ќе се гради врз сегашниот стар 30 години ризичен и 2,5 метри тесен мост без ограда, кој во дел ќе биде срушен па наново изграден.
Како што информира за МИА градоначалникот на Општината Горан Стојановски, мостот е дел од регионалниот пат 2344 од Чашка кон село Дреново, а неговата изградба ќе чини осум милиони денари плус ДДВ, средства добиени од ЈПДП.
Изведувач на работите е скопската фирма „Синтекс“, а рокот за градба е шест месеци.
– Со изградбата на новиот мост ќе се зголеми безбедноста на возилата и на жителите кои пеш поминуваат по него, што е првенствена грижа за нас како општина, потенцира градоначалникот Стојановски. ад/мс/
