Скопје, 11 јуни 2020 (МИА) – Заменик-министерот за животна средина и просторно планирање Јани Макрадули и градоначалникот на Општина Кисела Вода Филип Темелковски денеска ја посетија градинката во Расадник, каде се одвиваа градежни активности за поставување нови прозорци и надворешни врати.
За замена на дотраената надворешна столарија во објектот „Расадник“, што е во рамки на ЈДГ „8 Март“, Општина Кисела Вода аплицираше на повикот на Владата за реализација на Програмата за намалување на аерозагадувањето за 2020 година – енергетска ефикасност. Во градинката во тек се градежни работи за поставување на нова фасада со термичка изолација.
Заменик-министерот Макрадули потсети дека во 2019 година Општина Кисела Вода беше корисник на околу пет милони денари, средства од Планот за чист воздух. – Во Градинката „8 Март“ во Расадник, вредност од 1,6 милион денари се преточува во енергетски ефикасен објект, изјави Макрадули.
Напомена дека во сите европски држави економското закрепнувањето од КОВИД-19 оди со „зелена нишка“ и еден од приоритетите е енергетска ефикасност и замена на штетен начин на затоплување. Изрази задоволство што ги следиме препораките или она што е политика на ЕУ.
Градоначалникот Темелковски нагласи дека ги подобруваат условите на децата кои престојуваат во градинките во Општина Кисела Вода.
– Ќе ги подобриме условите на нашите најмлади жители – децата. Дополнително, Општина Кисела Вода со Цементарница Усје ја реновира целосно и фасадата. Покрај прозорците, ќе имаме и енергетски ефикасна фасада. Со тоа долгорочно гледаме за градинката да се заштедат големи средства, изјави Темелковски. Додаде дека ќе се реновира, ќе има подобри занимални и се создаваат подобри услови за престојот на децата во градинката.
Темелковски посочи дека ова е трет објект што добива некаков вид енергетска ефикасност. – Менуваме фасади, менуваме начин на загревање на нашите објекти и остануваме на нашата заложба за што поголемо намалување на трошоците во нашите објекти и што подобри услови за нашите деца, рече Темелковски. мд/дма/
Изјави по увидот на градинка во Расадник
Posted by MИА.mk on Четврток, 11 јуни 2020
