Дебар,1 јуни 2020 (МИА) – По повод Меѓународниот ден на детето, 1 јуни, општина Дебар организираше виртуелен ликовен конкурс на тема „Делови од животот“, на кој право за учество имаа учениците од сите општински училишта.
– Имајќи ја предвид состојбата со пандемијата со Ковид-19 и кризната и вонредна состојба во нашиот град и држава, а со цел да се врати надежта и да се поттикне креативноста го организиравме овој ликовен
конкурс. Учениците своите трудови можеа да ги изработуваат во техника по нивна желба, велат од општината.
На конкурсот пристигнале 55 ликовни творби, во кои преовладува актуелната состојба со пандемијата со
коронавирусот, а жирито составено од професори по ликовна уметност, ги избрало најдобрите три.
Првата награда е доделена на Амира Сеља за ликовната творба под наслов „Лекарите и сестрите ангели на спасот“, на која ќе и припадне наградата во износ од три илјади денари. Втората награда во износ од две илјади денари и е доделена на Рона Амбари за „Светот процвета“ и третата награда во износ од илјада денари и припадна на Реа Нуредини за „Внатре и надвор“.
Младите ликовни уметници ќе бидат примени од градоначалникот Хекуран Дука кој ќе им ги врачи наградите. вт/мс/
