Присилното исчезнување, иако е строго забрането со меѓународното право за човекови права во сите околности, продолжува да се користи ширум светот како метод за репресија, терор и задушување на несогласување, изјави денеска генералниот секретар на Обединетите нации, Антонио Гутереш.
По повод Меѓународниот ден на жртвите на присилно исчезнување, тој посочи дека, парадоксално, понекогаш се користи под изговор за спротивставување на криминал или тероризам.
„ Присилното исчезнување им го одзема правото на семејствата и заедниците да ја знаат вистината за своите најблиски, одговорноста, правдата и надоместокот“, нагласи тој.
Според него, пандемијата ја засили агонијата и страдањата од присилно исчезнување, ограничувајќи го капацитетот да се бараат исчезнати лица и да се испита наводното присилно исчезнување.
„ Конвенцијата за заштита на сите лица од присилно исчезнување е неопходна за да помогне во борбата против оваа кукавичка практика“, рече Гутереш, додавајќи дека, сепак, е потребна волја и посветеност на оние што се на власт.
Државите мора да ги исполнат своите обврски за спречување насилно исчезнување, потрага по жртви и истрага, гонење и казнување на сторителите, нагласи Гутереш.
Заедно, можеме и мора да ставиме крај на сите присилни исчезнувања, рече генералниот секретар на ОН.
