Откако ислуша дел од пресудата, Бојан Јовановски, кој доби нови девет години затвор, ѝ порача на судијката Софче Гаврилова-Ефремова дека е слуга на експремиерот Зоран Заев. Тој беше револтиран од моментот кога судијката убедуваше дека парите од околу 700 илјади евра биле законски одмрзнати и без да добие збор ѝ кажа: „Не, ослободени беа по налог на Зоран Заев, по негова интервенција за да ги лапнат парите“.
„Најголемата хиена, слуга на Зоран Заев. Оваа пресудата е доказ дека ти си слуга на Зоран Заев. Господ ќе суди, ќе казни“, рече Јовановски по што ја напушти судницата.
Реакцијата следеше откако судијката кажа: „Тие парични средства биле замрзнати да се провери потеклото во смисла тој што ги уплаќа. По проценката дека тие се легални пари“.
Четири казни за физички и една за правно лице, изрече судијката Софче Гаврилова-Ефремова заедно со судечкиот совет во случајот „Меѓународен сојуз“. На претседателот на невладината организација Бојан Јовановски-Боки13 му изрече девет години, заменик-претседателката Јасна Мандиќ доби четири години, таткото на Боки13, Миле Јовановски доби условна казна, експратеничката Фросина Ременски е ослободена од обвинение. Асистентката на Боки 13 – Кристина Блажевска и е изречена казна од една година. „Меѓународен сојуз“ треба да плати еден милион денари.
