Блиска соработничка на британскиот премиер Борис Џонсон поднесе оставка откако се појави видео на кое таа се смее и се шегува на сметка на забавата организирана во владата за време на минатогодишното божиќно заклучување, кога таквите собири беа забранети.
Алегра Стратон беше портпаролка на Џонсон кога видеото беше направено во декември 2020 година. Нејзината последна должност беше владина портпаролка на климатската конференција COP26.
„Со моето однесување ја намалив важноста на правилата, истите правила што другите мораа да ги следат. Тоа не беше моја намера. Ќе жалам за тоа до крајот на мојот живот“, им рече Стратон на новинарите пред нејзиниот дом, објавија агенциите.
