Ставовите на ВМРО-ДПМНЕ дека некој исклучил струја заради Мицкоски се на ниво на забагеноста со која режимот 11 години злоупотребуваше институции, гасеше струја, лифтови, местеше сообраќајки, фалсификуваше лични карти. Ваква е реакцијата на владејачкиот СДСМ откако претходно денеска опозициската партија обвини дека струја во половина Скопје снемало поради отчетот на Мицкоски. ВМРО-ДПМНЕ подоцна до медиумите го испрати и говорот на Мицкоски со наслов: Говорот што власта на СДСМ и ДУИ не сакаше да го чуе.
Официјалните лица информираа дека попладнево настанала експлозија на далекуводот кај Бунарџик и пожар во близина на трансформаторската станица во Пинтија. Од МЕПСО констатираа дека овие два фактори го условија испаѓањето од погон на двата 400/110 кV трансформатори, а со тоа и испадот на целата трафостаница Скопје 4 во населбата Пинтија.
Десетина скопски општини по експлозијата и пожарот останаа без струја.
Аеродром, Кисела Вода, Карпош 1,2,3,4, Мичурин, Автокоманда, се само дел од местата каде граѓаните немаа електрична енергија.
