Украинскиот претседател Володимир Зеленски денеска пристигна во Германија, каде што ќе се сретне со американскиот преговарачки тим и со европски лидери за продолжување на мировните преговори.
– Веќе сум во Германија. Денешната програма вклучува состанок со американскиот преговарачки тим. Се фокусираме на тоа како сигурно да ја гарантираме безбедноста на Украина, така што искуството од Будимпештанскиот меморандум и руската инвазија никогаш повеќе нема да се повтори. Сметаме на конструктивни преговори, напиша Зеленски на Телеграм.
Претходно, тој изјави дека сè уште не добил официјален одговор од Соединетите Американски Држави на најновите украински предлози за мировен план. Денот во Берлин Зеленски го опиша како „украинско-американски ден“, кој ќе вклучува и средба со германскиот канцелар Фридрих Мерц и други европски лидери.
