Скопјанка била ранета од заталкан куршум додека седела во дворот на својот семеен дом во скопската населба Драчево.
Според информациите од Министерството за внатрешни работи, на 14 септември во 21:45 часот во СВР Скопје било пријавено од Поликлиниката Драчево дека кај нив со повреда била донесена 57-годишната Ј.С. од Скопје.
Според пријавеното, околу 20:40 часот жената се наоѓала во дворот на семејниот дом кога одеднаш почувствувала удар во пределот на рамото.
По извршениот лекарски преглед било утврдено дека повредата била предизвикана од зрно од огнено оружје.
Засега не е познато од каде било испукано зрното, ниту кој пукал.
Од МВР информираат дека се преземаат мерки за целосно расчистување на случајот, утврдување на сите околности и пронаоѓање на сторителот.
