Утрински Весник
Македонија

За стент на лак на аорта повеќе не мора да се оди во Грција или во Словенија, Државната кардиохирургија ја направи првата операција

За стент на лак на аорта повеќе не мора да се оди во Грција или во Словенија, Државната кардиохирургија ја направи првата операција

Универзитетската клиника за државна кардиохирургија првпат стави стент на лак на аорта кај пациент со аневризма на лакот на аорта. Оваа специфична метода лекарите од Државната кардиохирургија велат дека во регионот се изведува само во Грција и Словенија за пациенти кои се високоризични. Се изведува со полесна анестезија и пациентите покусо време остануваат во болница.

dobivaj vesti na viber

„Се работи за специфична метода, за првпат во Македонија, а и пошироко, ставаме стент на лак на аорта кај болест која се вика аневризма на лак на аорта. Станува збор за многу сериозна болест со многу висока смртност, доколку не се лекува. Кај нас на Клиниката досега се работи рутински хируршки отворено лакот на аорта како метода и хибридно се работи, но за првпат ние ставивме стент на лак на аортата. Оваа метода се практикува кај пациенти кои имаат висок ризик од операција односно ние проценуваме дека не можат да издржат хируршки третман“, рече доктор Никола Лазовски, специјалист по општа и суп специјалист по васкуларна хирургија на Клиниката за државна кардиохирургија.

Стентирањето го извеле кај пациент за кого процениле дека е високоризичен. Пред вградувањето на стентот пациентот имал операција за подготовка.

„Прво се направи бајпас – премостување на крвните садови за мозокот и за рацете, а една недела подоцна се реализираше оваа процедура со два мали, по три сантиметри, резови на двете раце и еден рез од 5-6 сантиметри во едната препона. Така се пласираше стентот. Пациентот четири дена по интервенцијата си отиде дома. Сега е на домашно лекување. Беше веќе на две контроли и сите параметри, компјутерската томографија, лабораториските параметри и клиничкиот наод укажуваат на позитивен исход. Кај него се е во најдобар ред во моментов“, вели Лазевски.

Оваа метода било овозможено да се прави кај  нас со отворање на хибридната сала, која беше промовирана во мај годинава. Од Клиниката велат дека планираат да воведат уште цела низа нови методи во хибридната сала кои ќе помогнат во лекување на болестите на артериите и вените преку стентирање.

Директорот на Државната кардиохирургија Марјан Шокаровски кој беше назначен откога министерот Фатмир Меџити го разреши од должноста кардиохирургот Сашко Јовев, најави нов оддел на Клиниката.

„Во план е проширување на капацитетите и проширување на дејноста на нашата клиника со еден нов оддел, специфичен за срцева слабост со што би ги подобриле условите за лечење на тие пациенти. Би ги централизирале, би ги поставиле да бидат видливи тие пациенти затоа што третманот за нив треба да почне во раната фаза. Да бидат следени и да добијат соодветен третман. Во соработка со Клиниката за кардиологија би отвориле таков оддел кој би имал и посебна амбуланта и таму би биле опфатени сите делови од лекувањето. Од фармаколошка терапија, дијагностика до најсложените хируршки зафати вклучувајќи и трансплантација на срце“ рече директорот Шокаровски.

На Клиниката продолжуваат и со сите други програми како хибридните процедури за изведување и решавање на патолошките состојби на лакот на аортата, минимално инвазивните процедури за замена или поправка на срцевите валвули, минимално инвазивни процедури за аортокоронарно премостување и така натаму.

Можете да прочитате

Петровска ги посети војниците кои се дел од силите на НАТО во Бугарија

Министерот за внатрешни е против законот за амнестија

Ковачевски во посета на Дојран