Претседателот на Србија, Александар Вучиќ, најави дека ќе поднесе оставка од претседателската функција на 27 септември, по што планира да се вклучи во кампањата за предвремените парламентарни избори закажани за 25 октомври.
Во денешното гостување на Радио Белград, тој посочи дека оставката ќе ја поднесе в недела, на 27 септември, по враќањето од Њујорк каде што ќе учествува на Генералното собрание на ОН. Вели дека сака што побргу да ја ослободи канцеларијата за да може идната вршителка на должноста претседател на Србија, Ана Брнабиќ, веднаш да ја преземе должноста по неговата оставка.
Вучиќ истакна дека е горд на тоа што го направил како претседател и оти ѝ служел на својата земја верно, лојално и чесно.
Својата оставка тој веќе ја најави минатата недела, наведувајќи дека потоа ќе влезе во изборната кампања „како обичен граѓанин“.
Најави и големи кадровски промени, доколку политичкиот блок што го предводи ја добие поддршката од гласачите на парламентарните избори.
– Ако ја добиеме довербата на граѓаните, ќе има големи промени: влада со најмногу 12 министри, рече Вучиќ.
Уште на почетокот на септември, тој изјави дека сака да се кандидира за премиер и дека, доколку добие поддршка по изборите, ќе формира „најмала влада во историјата на Србија“.
Републичката изборна комисија веќе официјално ја прифати изборната листа „Александар Вучиќ – Обединета Србија“ за изборите на 25 октомври.
