Соопштение за јавност на ВЛЕН:
Од Вашингтон до Њујорк, првиот вицепремиер и генерален секретар на ВЛЕН, Беким Сали, беше дел од разговорите за партнерството со САД и европската иднина на Северна Македонија.
Во Вашингтон, Сали учествуваше на дискусијата на Атлантскиот совет посветена на безбедноста, соработката со САД и патот кон ЕУ.
Во Њујорк, за време на Неделата на Генералното собрание на ОН, тој учествуваше на средбата со италијанскиот министер за надворешни работи, Антонио Тајани, и претставници на групата „Пријатели на Западен Балкан”.
Во центарот на разговорите беше европската перспектива на регионот и потребата проширувањето на ЕУ да остане на политичката агенда.
За ВЛЕН, Северна Македонија треба да биде присутна во разговорите со партнерите кои влијаат врз иднината на регионот.
Европскиот пат бара реформи во земјата и континуиран ангажман со нашите меѓународни партнери. На Западен Балкан му се потребни конкретни чекори кон ЕУ.
Северна Македонија треба да го направи својот дел преку реформите, додека ВЛЕН ќе продолжи да го поддржува партнерството со САД и европската интеграција на земјата.
