Дел од улицата 9 Мај зад Универзалната сала во Скопје се одрони и пропадна во градилиште за нова зграда. Градежната инспекција од Општина Центар, вчера, откога се одронил дел од улицата, третпат направила увид на градилиштето.
„Градежен инспектор изврши увид вчера и повторно му наложи на инвеститорот да ја обезбеди јамата“, велат до Општина Центар за „Макфакс“.
И во претходните два увида инспекторите констатирале дека јамата е необезбедена. На првиот увид, заедно со општинскиот градежен инспектор и полицијата, излезе и градоначалникот на Центар, Горан Герасимовски, и го затворија градилиштето токму поради необезбедената градежна јама.
„Инспекцијата утврди дека инвеститорот постапувал спротивно од издаденото одобрение за градење и ја искинал жолтата лента со која утринава градежен инспектор на Општина Центар му го затворил градилиштето. Мора да сфатиме дека во оваа држава постојат закони и тие важат за сите“, изјави градоначалникот Герасимовски по увидот.
Градилиштето ,и по увидот со градоначалникот, само кусо време остана затворено оти при повторен увид инспекцијата утврди дека инвеститорот сам ја тргнал заштитната лента и продолжил да гради.
По вториот извршен увид, градежен инспектор на инвеститорот „Бинјапи инженеринг“ му одреди рок да го врати градилиштето во првобитната состојба и да продолжи да гради во согласност со издадената техничка документација. Вчера, при третиот увид, само констатирале дека инвеститорот повторно не ги почитува издадените решенија.
