Велика Британија ќе испрати експерти и опрема во Белгија за да ѝ помогне да ги спречи инцидентите со непознати беспилотни летала, поради кои привремено беа затворани аеродроми, соопшти денеска британската војска.
Минатата недела дронови биле забележани над белгиски аеродроми и воени бази, а во изминатите месеци се појавувале и во други делови на Европа.
Ричард Најтон, шеф на британските вооружени сили, изјави за BBC дека белгискиот колега побарал помош, и оти опремата и персоналот веќе се на пат.
– Министерот за одбрана и јас минатата недела се договоривме да ги испратиме нашите луѓе и опрема во Белгија за да помогнеме, рече Најтон, без да открие колку експерти се испраќаат и каква технологија ќе биде употребена.
Шефот на британската војска нагласи дека сè уште не е познато кој стои зад овие беспилотни летала, но дека Русија последниве години покажува шема на „хибридно војување“.
Москва ги отфрла тие обвинувања.
Дронови беа забележани над аеродромите во Брисел и Лиеж, поради што во вторникот многу авиони беа пренасочени.
Во четвртокот, поради дронови привремено беа затворени аеродроми во неколку држави, вклучувајќи ја и Шведска.
Германскиот министер за одбрана во петокот ги поврза неодамнешните инциденти со дронови во Белгија со дебатите во земјата за користење на замрзнатиот руски имот за заем на Украина.
