Утре, 30 декември, пред Амбасадата на Србија во Скопје ќе се одржи протест за солидарност со српските граѓани. Протестот е закажан за во 12 часот, а го организира Здружението за едукативен развој Еквалис.
„Еквалис го организира овој протест за да испрати силна порака на поддршка и поттик за истрајност кон храбриот српски народ кој со длабока посветеност сака одлучно да го симне авторитарниот режим и да побара политичка одговорност за случајот со срушувањето на настрешницата во Нови Сад во којшто беа убиени 15 луѓе, меѓу кои и еден македонски граѓанин“, велат од здружението.
Од таму велат дека на протестот солидарно ќе им се даде поддршка на студентите и студентките во Србија кои ги окупираат факултетите.
„Како држава којашто во своето демократско растење се има ослободено од авторитарноста преку Студентските пленуми, окупациите на факултетите и прогласувањето на факултетски автономни зони, нам, овој чекор не ни е непознат и нов и знаеме колку посветеност, храброст и истрајност се потребни да се застане на ваков начин во одбрана на својата држава“, додаваат од Еквалис.
На протестот ќе се прочита говорот и обраќањето на студентот Бошко Ристиќ од Нови САД.
„Ги покануваме граѓан(к)ите, студент(к)ите, младите, но и воопшто сите коишто сметаат дека, иако крајот на оваа година се ближи, не смееме да ги заборавиме оние коишто и покрај тоа продолжуваат да живеат во заробена држава“, велат од Еквалис.
