Утрински Весник
Македонија

Управниот суд пресуди дека Јолевски ја дискриминирал обвинителката Ленче Ристоска

Lenche Ristovska.jpg

Управниот суд пресуди дека поранешниот претседател и сегашен член на Советот на јавни обвинители, Антонио Јолевски ја дискриминирал обвинителката Ленче Ристоска.

Денеска Судот ја одби неговата тужба како неоснована и го прифати мислењето на Комисијата за спречување и заштита од дискриминација, па сега Јолевски ќе може да се жали пред Вишиот управен суд.

Паралелно со оваа постапка против Јолевски е поднесено барање до прекршочниот оддел во Кривичниот суд за да плати глоба затоа што не се извини иако Комисијата утврди дека ја дискриминал Ристоска затоа што била на породилно отсуство при изборот на обвинители во Вишото јавно обвинителство, кога таа по втор пат не беше унапредена.

Минатиот месец Јолевски и Ристоска се соочија пред Управниот суд откако тој не ја прифати одлуката на Комисијата и поднесе тужба до Управниот суд. Не сакаше јавно да се извини и тврдеше дека не ја дискриминирал обвинителката.

Неговата теза е дека Ристоска не била унапредна затоа што тогашниот републички Јавен обвинител не доставил извештај за нејзината работа иако членовите на Советот на јавни обвинители побарале ваков извештај за да извршат оценување.

–Пресудни беа извештајите за работа. Породилното отсуство беше споменато во контекст на немањето на извештаји. Изјавата беше извадена од контекст и погрешно сфатена. Ми е жал што немаше извештаји за работа за да одат во прилог на унапредувањето. Изнесував факти што постојат. Таман работа да е проблем породилното отсуство. Да има деца во оваа држава оти наталитетот ни е во опаѓање. Јас за неа гласав во 2021, рече Јолевски на рочиштето.

Ристоска не се откажа за да докаже дека била дискриминирана само затоа што е на породилно отсуство. Побара одговорност за дискирминацијата и смета дека Јолевски сака да избегне одговорност.

–Според мене важно е да постои одговорност за случаи на дискриминација на жени на работно место бидејќи жените не мора да ги загушуваат амбициите заради возраста, ниту пак да бираат дали ќе бидат мајки или ќе имаат успешна кариера. Сметам дека ваквите мислења на Комисијата и одговорот на правосудниот систем се најефикасната алатка за борба на општеството против антидискриминаторските политики, порача таа.

Спораната изјава беше пренесувана од многу медиуми и гласеше: –Кај Ленче имаме недостаток на работа по различни предмети во овој период. Зборуваме за различни предмети со кои би се сретнала во Вишото јавно обвинителство. Немаме извештај за неа за последните четири години, таа еден период е и на трудничко отсуство. Во Вишото обвинителство се бара работа по сите видови предмети, не само на одредена категорија во одредена област, сепак, СЈО не работеше кривични дела убиства, не работеше со дрога еден куп предмети кои ги работат во основното обвинителство, а ќе треба да одлучува и за тие предмети. не ја елиминиравме…таа во моментов е и на породилно и да изберевме, пак ке биде на породилно, изјавил Јолевски.

Советот на јавни обвинители минатата година по втор пат не ја избра обвинителката Ристоска за обвинител во Вишото јавно обвинителство Скопје и обвинителот, Љубомир Лапе кој последно го отвори случајот „Феникс“ за спорниот проект „Скопје 2014“. Во 2021 година не беше избрана со образложение дека била млада.

Овие одлуки на Советот беа донесени по критиките на Ристоска кон Советот, по што беше воведен Етички кодекс за обвинителите, со којшто беа замолчени, а вториот неизбор следеше откако даде изјава дека членовите на Советот тргуваат со влијание.

Ристоска сега е обвител за врски за „Европравда“ и пред неколку месеци кончено доби канцеларија во Обвинителството

Можете да прочитате

Таравари: Нема докази дека е бебето е намерно повредено, но има дисциплински мерки

Петровска до ВМРО-ДПМНЕ: Не глумете опозиција, власт сте

Случајот е затворен: Родителите на бебето и медицинската сестра се смирија и си подадоа рака