Сегашните копнени алтернативни рути не можат да ја компензираат загубата на Црното Море, изјави украинскиот министер за надворешни работи Дмитро Кулеба, додавајќи дека Киев не може едноставно да прифати дека Црноморскиот договор за извоз на жито повеќе не функционира и ќе работи на изнаоѓање решение.
„Мораме да најдеме алтернатива, активно разговараме за тоа. Но, клучната порака е дека за решение е потребна политичка волја. Ова не е лесна ситуација. Мора да преземеме ризици и да покажеме дека можеме да продолжиме без Русија. Сега е вклучена секоја опција“, рече тој.
Постојат алтернативни патишта за украинскиот извоз на жито и маслодајни семиња со железница преку Источна Европа, но тие не се доволни.
„Со блокирањето на договорот, Русија сака да добие отстапки за сопствениот извоз, ова е уцена што не треба да се толерира. Наместо да ја игра оваа игра, Русија треба да игра со добра волја и да ја имплементира иницијативата за жито од Црното Море“, вели Кулеба.
