Дисциплинската комисија на УЕФА го казни холандскиот прволигаш АЗ Алкмар поради дивеењето на навивачите на натпреварот од Конференциската лига против Вест Хем во мај оваа година. УЕФА го казни АЗ со вкупно 80.000 евра и условно еден натпревар без публика поради навивачки нереди во полуфиналето на Конференциската лига.
Англискиот тим победи со 1:0 во Алкмар, откако во Лондон беше 2:1, со што го потврди пласманот во финалето. Сепак, по завршувањето на мечот во Холандија дојде до навивачки нереди. Група локални хулигани упаднаа во дел од главната трибина каде имаше околу двесте навивачи на лондонскиот клуб, од кои повеќето беа членови на семејствата на фудбалерите и пријатели на клубот.
Навивачите на АЗ ги нападнаа посетителите, а неколку играчи на Вест Хем ја прескокнаа оградата и влегоа меѓу хулиганите за да ги одбранат своите семејства. УЕФА го казни АЗ со 50.000 евра за навивачите кои се префрлиле од еден сектор во друг и ја нападнале гостинската трибина.
Дополнителни 15 илјади евра ќе треба да се платат пораи употреба на пиртехнички средства, осум илјади евра за блокирање на скалите на трибините, а 7.125 евра за фрлање предмети. АЗ е условно казнет со играње на домашен натпревар без публика, во период од две години.
