Тројца актуелни или поранешни директори на јавни здравствени установи вратиле по 500.000 денари, односно вкупно 1,5 милион денари, средства што претходно ги добиле врз основа на неправилна пресметка на плата.
Ова го соопшти Фонд за здравствено осигурување на Северна Македонија преку генералниот директор Сашо Клековски, кој посочи дека институцијата, покрај медицинската, врши и постојана финансиска контрола.
„Во три случаи актуелни или поранешни директори ги вратија погрешно пресметаните приходи од речиси еден и пол милион денари“, изјави Клековски.
Тој нагласи дека целта е да се воспостави систем во кој ќе се почитуваат правилата и одговорноста, додавајќи дека паралелно со контролите се работи и на подобрување на примањата во здравствениот сектор.
Според него, платите во здравството веќе бележат раст, вклучително и зголемување на капитациите за матичните лекари, како и дополнителни покачувања најавени од март.
„Испраќаме јасен сигнал дека трудот ќе биде соодветно вреднуван, но истовремено очекуваме фер однос и прекин на злоупотребите, особено во делот на додатоците“, истакна Клековски.
Тој додаде дека Фондот ќе продолжи со комуникација со здравствените установи и синдикатите со цел воспоставување транспарентен и правичен систем.
„Не може да има самовреднување и самонаплата. Ќе се воспостават јасни правила кои ќе важат за сите“, потенцираше Клековски.
