По состанокот во Владата, претседателот на Сојузот на синдикатите на Македонија (ССМ), Слободан Трендафилов, изјави дека Владата не е пречка за зголемување на минималната плата, туку вистинскиот проблем доаѓа од страна на другите синдикати.
„Само ССМ ги застапува интересите на работниците – бараме раст на платите во јавниот и приватниот сектор. Владата јасно кажа дека не се против зголемување на минималната плата“, рече Трендафилов.
Тој посочи дека некои синдикати кои присуствуваа на средбата барале укинување на одредби од Општиот колективен договор, што, според него, оди на штета на вработените во јавниот сектор.
„Важно е што Владата не кажа ‘не може и нема да има зголемување’. Тоа го рекоа другите синдикати“, нагласи тој.
Работодавачите од приватниот сектор, според него, се повлекле од преговорите откако виделе дека ССМ е нападнат, а тој ги повика сите политички партии на разговор во Работничкиот дом за идниот раст на платите.
„Состанокот траеше час и половина, а присуствуваше и самиот премиер заедно со министерот за економија. Тоа е позитивен сигнал – не разговараме со советници, туку со клучни носители на одлуки“, изјави Трендафилов.
