Пратеникот на СДСМ Митко Трајчулески во емисијата 24 Анализа, на телевизија 24 истакна дека иницијативата предложена од СДСМ и од претседателот Венко Филипче е во насока на воспоставување на нов концепт за политички дијалог.
-Иницијативата е еден чесен пристап кон нашите граѓани, носење на одговорност во однос на сите реформи кои треба да бидат направени. СДСМ подаде рака до сите политички партии со јасен, концепт по однос на спроведување на системски, темелни реформи, кои се однесуваат на образованието, здравството, правосудството на животната средина, се она што нашите граѓани го очекуваат, рече Трајчулески.
Тој нагласи дека трагедијата што се случи во Кочани и неколку вакви трагедии за неколку години, треба да ја подигнат свеста и во овие моменти да ги обединат и политичарите и пошироко целaтa општествена, стручна јавност, се со цел да се насочиме кон она што се потреби на граѓаните, а потреби се сериозни системски реформи.
-Ние не сме наивни, ние знаеме дека ваков тип на средби може да значат и политички ризик за СДСМ, меѓутоа ние како политичка партија покажуваме дека секогаш се раководиме од државните интерси и од интересите на граѓаните и сметам дека не постои нити политички рејтинг нити рејтинг на било кој политичар, кој е поважен од она што е државен, национален интерес на граѓаните, истакна Трајчулески.
Пратеникот Трајчулески нагласи дека граѓаните од било која етничка заедница ја живеат истата реалност, се соочуваат со истите потешкотии и проблеми.
-Ние сме должни по однос на сите тие барања на граѓаните, што е можно поскоро да постапиме соодветно, со вклучување, не само на политичките лидери, политичките партии, туку и пошироката јавност, тука зборувам за Академијата и за оние млади прогресивни луѓе, кои ги искажаа своите барања на мирните протести. Сите тие барања треба да бидат земени предвид, затоа што сметам дека немаме поправен испит како држава и ако ова не го направиме што е можно побрзо, зборувам за системски реформи, функционалност на институциите, ризикуваме младите се повеќе да ја бараат својата иднина надвор од државата, на тој начин да останеме без народ и бадијала се сите политички партии и рејтинзи ако немаме народ, односно ако го изгубиме народот, порача пратеникот на СДСМ Митко Трајчулески, во во емисијата 24 Анализа, на телевизија 24.
