Осум ученички од основно училиште во истанбулскиот округ Башакшехир се повредени и пренесени во болница откако утрово со нож ги нападнала ученичка од друго училиште, јави весникот „Биргүн“. Турскиот министер за здравство, Кемал Мемишоглу, изјави дека по инцидентот три од ученичките се во тешка состојба.
Според соопштението на Гувернерството на Истанбул, инцидентот се случил нешто пред 09:00 часот по локално време во основно училиште од типот „Имам хатип“. Овој тип училишта обезбедува проширено образование за сунитскиот ислам, арапскиот јазик и Куранот. Повредените ученички биле пренесени во болница, додека останатите ученици го напуштиле објектот и наставата била прекината.
Според информациите од локалните власти во Башакшехир, ученичката која го извршила нападот има 15 години и учи во едно од средните училишта во истанбулскиот округ Кучукчекмеџе.
Причината за нападот сè уште не е утврдена, но се претпоставува дека станува збор за расправија меѓу млади. За случајот веќе е отворена официјална истрага, а турскиот медиумски регулатор, Високиот совет за радио и телевизија (РТУК), соопшти дека воведува забрана за објавување какви било новинарски материјали поврзани со случајот до нејзиното завршување.
Информацијата доаѓа во услови на засилени безбедносни мерки во училиштата во Турција по серијата случаи на пукање во образовни институции. Во последниот таков случај, кон крајот на септември, наставник беше убиен откако во него пукаше неговиот внук во дворот на средно училиште во округот Османије, во јужна Турција. Само неколку дена претходно, 15-годишен ученик отвори оган пред Стручно-техничката гимназија „Инџи Јузмез“ во општина Тургутлу, во турскиот округ Маниса, при што рани 11 лица.
Во април годинава, 14-годишен ученик отвори оган во две училници во своето училиште во југоисточниот округ Кахраманмараш, при што уби десет ученици и наставници и рани уште 13 лица. Напаѓачот беше убиен од полицијата.
Еден ден претходно, 16 лица, од кои повеќето ученици, беа повредени откако поранешен ученик отвори оган во гимназија во округот Шанлиурфа, што се граничи со Кахраманмараш. Подоцна напаѓачот изврши самоубиство.
