Воздушниот простор на Грција од утрово е целосно затворен за сите летови кон и од сите аеродроми во земјата, поради проблеми со радиофреквенциите, јавува дописничката на МИА од Атина. Извори од Министерството за транспорт на Грција објаснија дека одредени фреквенции кои го опслужуваат ФИР Атина се соочуваат со дефект, кој се истражува во соработка со надворешни надлежни институции.
За да се обезбеди максимална безбедност на летовите, во моментов се овозможуваат само ограничен број на прелети, а на грчките аеродроми воведени се посебни ограничувања. Според грчките медиуми, авионскиот сообраќај е во прекин од 9 часот утрово, а некои авиони што требало да слетаат се пренасочуваат кон соседните земји, пред сè кон Турција.
