На 8 и 9 октомври 2025 година, во просториите на Машинскиот факултет при Универзитетот „Св. Кирил и Методиј” во Скопје, ќе се одржи дводневниот Саем за пракса и вработување TECHMECH 2025, со цел да се поврзат студентите, академијата и индустријата на едно место. Настанот ќе трае од 11:00 до 17:00 часот во двата дена.
Организатор на настанот е Факултетското студентско собрание на Машинскиот факултет, во соработка со Машинскиот факултет – УКИМ, Центарот за кариера при УКИМ, ЦИЗИ и ЦИРКО.
Оваа година, TECHMECH 2025 обединува 26 компании партнери од различни индустриски сектори.
На TECHMECH оваа година може да ги видите:
Adient, Alkaloid, Amphenol, Draxlmaier, Fero Invest, Gentherm, Gerresheimer, Halkbank, Inter Construction, Johnson Matthey, Kentaur Impex – Iskra Kumanovo, Laminati Kom, LEAR Corporation, LTH, MAN, Mikrosam, OKTA, PwC, Rade Končar TEP, Road Legends, Skopska Pivara, Telamon, Triglav Osiguruvanje, Vardar Dolomit, VDL Van Hool и Wabtec.
Им упатуваме благодарност на сите компании кои пристапија како наши партнери и ја приближија индустријата до студентите.
Посебна благодарност е упатена до златните партнери на Саемот: Road Legends, Mikrosam, LTH, Gerresheimer, VDL Van Hool и Fero Invest, Draxlmaier и Triglav osiguruvanje кои со својата поддршка овозможуваат реализација на настанот на највисоко ниво.
Во рамките на TECHMECH 2025 се предвидени бројни активности, работилници и панел дискусии, меѓу кои:
Панел 1 – „Квалитетен кадар – сигурна иднина”, кој ќе се одржи на 8 октомври (вторник) со почеток во 12:00 часот во салата за состаноци при Деканатот;
Панел 2 – „Индустрија – образование: зелени иновации и одржливи практики”, кој ќе се одржи на 9 октомври (среда) со почеток во 12:00 часот, исто така во салата за состаноци при Деканатот.
Преку изложбени штандови, работилници и презентации, студентите ќе имаат можност да воспостават директен контакт со компании, да се информираат за тековни програми за пракси и вработување, како и да научат повеќе за барањата и перспективите во инженерската професија.
Саемот е отворен за сите студенти на Универзитетот „Св. Кирил и Методиј” во Скопје, без разлика на факултетот, кои сакаат да се запознаат со компаниите, да најдат можности за пракса и да направат чекор поблиску кон својата иднина во индустријата и технологијата.
Со TECHMECH 2025, Машинскиот факултет уште еднаш ја потврдува својата улога како мост помеѓу образованието и индустријата, создавајќи средина каде што знаењето се претвора во реална можност.
