Топлите летни вечери се идеални за уживање на тераса или балкон, но честопати расположението го расипуваат комарците. Наместо постојано да користите спрејови и хемиски препарати, постои природно решение што сè почесто го избираат љубителите на цвеќиња.
Станува збор за темјан, познат и како хиландарски босилек или Света Петка – украсно растение чиј специфичен мирис ефикасно ги одбива комарците.
Доволно е да поставите неколку саксии со темјан на терасата, балконот или во дворот и ќе создадете природна бариера против овие досадни инсекти.
Освен што помага во одбивањето на комарците, темјанот има пријатен и препознатлив мирис кој внесува свежина во просторот.
„Темјанот не бара многу нега, го сака сонцето и мириса прекрасно“, вели љубителот на цвеќиња Дејан Драгиќевиќ.
Растението е лесно за одгледување и одлично се комбинира со цвеќиња како петуниите, па освен што ќе ја разубави терасата, ќе ви овозможи и попријатни летни вечери без комарци.
