Европската унија разгледува можност за класификација на етанолот, кој се користи во многу средства за дезинфекција на раце, како опасна супстанца што може да го зголеми ризикот од рак, објавија „Ројтерс“ и „Фајненшл тајмс“.
Внатрешна препорака од 10 октомври од една од работните групи на Европската агенција за хемикалии (ECHA) го идентификува етанолот како токсична супстанца која може да предизвика канцерогени ефекти и компликации при бременост, и предлага негово заменување во средствата за чистење и други производи.
Комитетот за биоцидни производи на ECHA ќе се состане меѓу 25 и 28 ноември за да го разгледа прашањето. Регулаторот соопшти дека доколку експертскиот комитет заклучи дека етанолот е канцероген, ќе препорача негово заменување, додека конечната одлука ќе ја донесе Европската комисија.
Европската агенција за хемикалии истакнува дека етанолот „сè уште може да биде одобрен за биоцидна употреба доколку се смета за безбеден со оглед на очекуваните нивоа на изложеност или доколку не се пронајдат алтернативи“.
Светската здравствена организација, сепак, ги класифицира и етанолот и изопропанолот како безбедни за употреба за хигиена на рацете.
