Советот за безбедност на Обединетите нации во понеделникот побара итен прекин на огнот во војната меѓу Израел и палестинската милитантна група Хамас и итно и безусловно ослободување на сите заложници, откако САД се воздржаа од гласање.
Останатите 14 членови на Советот гласаа за одлуката предложена од 10 непостојани членови на тоа тело.
Ова е првпат, по повеќе од пет месеци војна, Советот за безбедност на ОН конечно да усвои резолуција со која се бара „итен прекин на огнот“.
Вашингтон претходно беше наклонет на зборовите „прекин на огнот“ во речиси шестмесечната војна во Појасот Газа и досега го користеше правото на вето за да го заштити американскиот сојузник Израел во неговата војна против Хамас.
Но, со зголемениот глобален притисок за примирје во војната во која загинаа повеќе од 32.000 Палестинци, САД се воздржаа од гласањето во понеделникот за да му дозволат на Советот за безбедност да побара итен прекин на огнот за време на Рамазан, кој завршува за две недели.
Исто така, бара итно и безусловно ослободување на сите заложници.
Според Израел, Хамас зел 253 заложници за време на нападот на 7 октомври во кој загинаа 1.200 луѓе.
Резолуцијата на Советот за безбедност, исто така, „ја нагласува итната потреба за зголемување на протокот на хуманитарна помош и зајакнување на заштитата на цивилите низ Појасот Газа и го повторува барањето за укинување на сите пречки за обезбедување хуманитарна помош од големи размери“.
„Пет месеци палестинскиот народ ужасно страда. Ова крвопролевање трае предолго. Наша обврска е да ставиме крај на тоа. Конечно, Советот за безбедност го презеде својот дел од одговорноста“, го поздрави усвојувањето на резолуцијата алжирскиот амбасадор Амар Бендјама.
Израелското армиско радио непосредно пред почетокот на состанокот на Советот објави дека израелскиот премиер Бенјамин Нетанјаху ќе ја откаже планираната делегација во Вашингтон доколку САД не стават вето на резолуцијата.
