Собранието денеска го усвои Буџетот за 2026 година, кој е планиран како реален и консолидиран инструмент за одговорно управување со јавните финансии. Вкупните приходи се предвидени на 374,9 милијарди денари, а расходите на 414,2 милијарди денари, со буџетски дефицит од 39,2 милијарди денари или 3,5% од БДП.
За капитални инвестиции се планирани 40,1 милијарда денари за инфраструктурни, енергетски и други проекти важни за развојот на земјата. Буџетот обезбедува и редовна исплата на плати, пензии, социјални трансфери и субвенции, како и поддршка за економијата и иновативни активности. За плати се предвидени 52,6 милијарди денари, за пензии 116,8 милијарди, за социјална заштита 12 милијарди, а за здравство 53,8 милијарди денари.
„Буџетот е изработен со јасна визија, со одговорен пристап кон јавните финансии и со цел секој денар од народните пари да биде насочен таму каде што ќе донесе најголем поврат за граѓаните и економијата. Овој Буџет не е само документ со бројки и табели тој е економска порака за стабилност, доверба и развој“, рече Димитриеска-Кочоска.
Министерката истакна дека со новиот предлог се обезбедува ликвидност во јавните финансии и континуитет во навремена исплата на сите обврски.
