Со минута молк во знак на почит кон жртвите од трагедијата во кочанската дискотека „Пулс“, чии последици продолжуваат да шокираат, денес започна состанокот на стручниот колегиум на Јавното обвинителство во проширен состав. Бројот на загинати лица во трагичниот пожар се искачи на 60, откако денеска почина уште едно лице кое било тешко повредено во настанот.
Обвинителскиот тим кој постапува по предметот на Основното јавно обвинителство Кочани го информираше колегиумот за досегашните преземени активности, концептот на истражувањето, како и за стручните аспекти кои се земаат предвид при утврдување на кривичната одговорност за несреќата.
Стручниот колегиум на Јавното обвинителство изрази целосна поддршка за тековната работа на обвинителите, кои моментално паралелно водат истражна и предистражна постапка од широк опсег. Сите капацитети на Јавното обвинителство се ставени на располагање на тимот со цел брзо, но темелно расветлување на околностите и одговорноста за трагедијата.
Од Јавното обвинителство информираат дека денешната 60-та жртва од пожарот е лице кое веќе било опфатено со наредба за спроведување истражна постапка, во својство на управител на правно лице. По прибавување на потребната официјална документација за настапената смрт, Основното јавно обвинителство Кочани ќе донесе наредба за запирање на истражната постапка за него.
Трагедијата во „Пулс“ останува најголема катастрофа од ваков тип во поновата историја на земјата, а јавноста очекува целосна и објективна истрага со соодветна одговорност.
