Рускиот претседател Владимир Путин опстојува на својот став кон војната во Украина, изјави германскиот канцелар Олаф Шолц.
„За жал, не можам да кажам дека разбрал оти е грешка да се почне оваа војна“, рече Шолц коментирајќи го телефонскиот разговор со Путин одржан во вторникот, кој траеше еден и пол час.
Но, Шолц нагласи дека сепак има смисла да се разговара со рускиот лидер за да се објасни германската позиција.
„Цврсто сум убеден дека Русија треба да ја повлече својата војска за да има изгледи за мир во регионот. И секој ден мислам дека тоа е единствениот начин“, рече тој.
Тоа беше првиот разговор на Шолц со Путин по повеќе од три месеци.
Тој опстојуваше на идејата дека дипломатско решение и целосно повлекување на руската армија мора да се постигне што е можно побргу.
