Полицијата уапси момче на 24-годишна возраст, за напад со нож врз неколку лица во областа Бодмин во Корнвол на југозападот на Англија, при што еден маж (30) беше убиен, а уште седум лица беа повредени.
Полицијата добила дојава дека на плоштадот Викторија во Бодмин во неделата биле избодени неколку лица, а млад човек од тој град е уапсен под сомнение за убиство, обид за убиство и тешка телесна повреда со умисла, јавува Sky News.
Вишата инспекторка Илона Росон, од тимот за истрага на големиот криминал на полицијата во Девон и Корнвол, рече дека станува збор за изолиран напад.
„Истрагата на полицијата е во тек и би ги повикала луѓето да не шпекулираат на социјалните мрежи, но доколку имате какви било информации кои би можеле да ни помогнат, ве молиме пријавете ги“, додаде таа.
Началникот на локалната полиција во Источен Корнвол, Роб Јангман, рече дека истрагата е во рана фаза и дека може да се очекува зголемено полициско присуство околу Бодмин.
