Година и половина, кадрите на шпицниот градоначалник Христијан Мицкоски во над 40 општини во државата не работат ништо, освен што ги задолжуваат и партизираат општините, удираат по џебот на граѓаните со покачување на цените на комуналните услуги, обвини владејачката СДСМ.
„ Со градоначалниците на ВМРО-ДПМНЕ, граѓаните наместо развој и реализација на најавените капитални проекти, добија НУЛА проекти, безидејност и стагнација. Бидејќи, освен неспособност и неработење немаат што да покажат се фатија за споменикот на Ќосето, клучниот симбол на Груевизмот, споменикот на егзекуторот на ВМРО, џелат кој извршувал нарачки за убиства кој, стоеше пред палатата на правдата, како порака, што може да ги снајде сите кои мислат поинаку.
Прво градоначалничката на Скопје поддржана од ВМРО-ДПМНЕ и Левица, Данела Арсовска бараше споменикот на Ќосето да биде вратен на претходната локација. Потоа, Советот на општина Аеродром, на предлог на Левица со поддршка на ВМРО-ДПМНЕ, усвои иницијатива со која ќе побара од Собранието поставување на споменикот на Андон Лазов Јанев Ќосето на територија на Аеродром“ велат од партијата.
Оваа иницијатива, како што велат, е само уште една потврда дека ВМРО-ДПМНЕ и Левица се доследни на тоталитарната идеологија на бегалецот во Будимпешта, Никола Груевски.
Според СДСМ, градоначќалниците на ВМРО-ДПМНЕ наместо со нови капитални инвестиции, ги враќаат старите споменици со спорна симболика.
