Рускиот амбасадор во Полска Сергеј Андрејев е повикан на разговор во Министерството за надворешни работи, по инцидентот кај украинската граница, каде падна ракета и предизвика експлозија во која загинаа две лица, пренесуваат медиумите во регионот.
Портпаролот на полското Министерство за надворешни работи Лукаш Јасина изјави дека средбата меѓу министерот Збигњев Рау и рускиот амбасадор траела „само четири минути“, пренесе Си-Ен-Ен.
„Министерот Збигњев Рау и делегацијата што го придружуваше го примија Андрејев без никаква учтивост, без ракување. На амбасадорот му беше прочитана нашата дипломатска нота, што е слично на коминикето што го објавивме“, вели Јасина.
Руското Министерство за одбрана претходно денеска објави дека руски експерти ги идентификувале остатоците на фотографиите објавени по експлозијата во Полска, како остатоци од украинскиот противвоздушен ракетен систем С-300.
