Русија ги вклучи жителите на окупираните делови од Украина во гласањето за новиот состав на Државната дума, првпат по едностраната анексија на четирите украински региони во 2022 година.
Гласањето се спроведува во делови од Доњецката, Луганската, Херсонската и Запорошката област, кои не се целосно контролирани од руските сили. Во изборниот процес е вклучен и Крим, кој Русија го анектираше во 2014 година.
Анексијата на украинските територии не е меѓународно признаена. Украина, Европската Унија и поголемиот дел од меѓународната заедница го сметаат организирањето руски избори во овие области за незаконско и за ново кршење на украинскиот суверенитет.
Украинските власти и организации за заштита на човековите права тврдат дека дел од жителите се изложени на притисоци да гласаат. Според нивните наводи, изборните претставници во одредени места биле придружувани од вооружени руски припадници, а населението било предупредувано дека негласањето може да влијае врз социјалните права или вработувањето во јавниот сектор.
Москва ги отфрла обвинувањата и тврди дека гласањето се спроведува во согласност со руските закони. Рускиот претседател Владимир Путин ги повика граѓаните да учествуваат на изборите, претставувајќи го гласањето како потврда на националното единство.
