Струшката полиција поднесе кривична пријава против родителите на 16-месечното дете кое минатиот месец со хематом на главата и скршеници на градите и на едната рака беше донесено во специјализираната болница за ортопедија и трауматологија „Св. Еразмо“ во Охрид, а од таму итно беше префрлено на Детска хирургија во Скопје. Полицијата соопшти дека за родителите, А.М. (25) и неговата вонбрачна сопруга А.И.(21), двајцата од Струга постои основано сомневање дека сториле кривично дело запуштање и малтретирање дете.
„На 12 февруари годинава околу 11 часот, во СВР Охрид добиена е пријава дека во болницата ’Св.Еразмо’ со тешки телесни повреди било донесено 16-месечно дете од Струга. По преземени мерки констатирано е дека во домот на пријавените врз малолетникот паднал дел од мебел“, извести полицијата.
Тешко повреденото 16-месечното дете со возило на струшка Итна помош било однесено во „Св. Еразмо“, а откако таму било дијагностицирано и му била пружена помош, со истото возило веднаш било испратено на Детска хирургија во Скопје.
Директорот на „Св.Еразмо“, Ацо Велески за „Макфакс“ изјави дека детето било примено кај нив со фрактури на градите, хематом на главата и други повреди по телото. Случајот го пријавиле во полиција, а истовремено биле ангажирани и социјалните служби поради сомнежот дека детето е жртва на семејно насилство.
На Клиниката за детска хирургија 16 – месечното дете беше сместено на интензивна нега и веднаш му беше закажана операција на левата надлкатица. Директорката на Клиниката, Славица Литајковска за „Макфакс“ изјави дека при прегледите кај детето откриле и стари хематоми, покрај оној на главата.
Полицијата и стручните служби од Центарот за социјални работи по насоки од јавен обвинител четири недели работеа на утврдување дали се работи за случај на семејно насилство и не откриваа како се повредило 16-месечното дете.
