Организирана криминална група од затвор вршела недозволена трговија со дрога.
Според информациите, две лица, кои додека биле во затворот во Струга, користејќи поволности за секојдневен излез од затворот, заедно со третото лице, продавале кокаин на други лица низ целата држава. Одделот за сузбивање на организиран и сериозен криминал, Секторот за криминалистички истраги – Единица за недозволена трговија со дрога во текот на повеќемесечна истрага обезбеди материјални докази за работата на организираната група, против кои до ОЈО ГОКК од страна на ОСОСК е поднесена кривична пријава за сторено кривично дело по член 215 став 3 од Кривичниот законик.
Имено, Т.Ш. и Д.О., како дел од оваа организирана криминална група, биле на издржување казна затвор во Казнено-поправната установа во Струга каде, користејќи поволности за секојдневен излез од затворот, заедно со лицето А.М., продавале кокаин на лица од целата држава, за што ОСОСК има обезбедено и документирано купопродажби и доказен материјал. На 20.12.2022 извршен е претрес во домот кај А.М., кој заедно со Т.Ш. и Д.О., кои во моментов се наоѓаат во Казнено-поправна установа во Битола, во текот на денот ќе бидат изнесени пред Судија на претходна постапка од Основниот кривичен суд во Скопје.
