Пролетта донесе нова радост во скопската зоолошка градина – семејството на белораките гибони е збогатено со уште едно младенче, соопштија од ЗОО Скопје.
„Софи и Делфина добија братче или сестричка, а нашето ново бебе гибонче постојано е во прегратките на мајката. Фотографијата е направена оддалеку за да не ги ставаме во стресна состојба“, истакнаа од зоолошката.
Според нив, напредокот на новороденчето е под постојан надзор на зоонегувателите. Белоракиот гибон е екстремно загрозен вид со потекло од Индонезија. Бременоста кај овие примати трае шест месеци, а обично се раѓа само едно младенче, кое останува врзано со мајката најмалку две години. Потполната зрелост ја достигнува на осумгодишна возраст.
„Во светот се помалку се раѓаат единки од овој вид, а во Скопје ЗОО ова е трето бебе во последните шест години“, додаваат од зоолошката градина.
