Компанијата „Гаспром“ изврши увид на местото каде што се случи експлозијата во која беа оштетени цевките на гасоводот „Северен поток“, изјави рускиот претседател Владимир Путин.
„ Добив извештај од (директорот на Гаспром, Алексеј) Милер дека направиле инспекција. Патем, на Гаспром му е дозволено да ги испита местата на експлозијата“, рече Путин. Тој додаде дека се пронајдени два кратери – еден длабок три метри и еден длабок пет метри.
Путин оцени дека е бесмислено да се обвинува Русија дека е одговорна за експлозијата на гасоводот.
Нападите на гасоводите „Северен тек 1“ и „Северен тек 2“ беа извршени на 26 септември.
Руското Министерство за одбрана ги обвини претставниците на британската морнарица за учество во планирањето и спроведувањето на, како што тврди Москва, „терористички напад“ во Балтичкото Море на 26 септември, кога беа оштетени гасоводите „Северен тек 1“ и „Северен тек 2“, потсетува РИА Вести.
Путин рече дека центар за природен гас во Турција може да биде воспоставен прилично брзо и предвиде дека многу купувачи во Европа ќе сакаат да потпишат договори. Тој ја предложи Турција како база за снабдување со гас претходно овој месец, откако гасоводите „Северен тек 1“ и „Северен тек 2“ под Балтичкото Море беа оштетени во експлозиите во септември. Турскиот претседател Реџеп Таип Ердоган рече дека се согласува со таа идеја.
Путин изјави дека е многу тешко да се работи директно со европските трговски партнери.
„ Полесно ни е да работиме со Турција. Претседателот Ердоган е човек од збор…и полесно ни е да го контролираме Црното Море“, рече Путин на прес-конференција.
„ Ова е многу реален проект и можеме да го направиме доста брзо, а ќе има доволно луѓе кои сакаат да склучат договор… Не се сомневам дека има многу луѓе во Европа кои го сакаат тоа“, заклучи тој.
