Продажбата на нови автомобили во Европа закрепна во 2023 година, порасна за 13,9 отсто бидејќи електричните возила го надминаа дизелот за прв пат, соопшти индустриската групација.
Продажбата на нови електрични автомобили порасна за 37 отсто на годишно ниво и сочинува 14,6 отсто од вкупното ниво, објави во четвртокот Европската асоцијација на производители на автомобили.
Бројките означуваа остар пресврт од оние од 2022 година, кога регистрациите на нови возила паднаа на најниско ниво од 1993 година, бидејќи недостигот на компоненти ги попречуваше производителите на автомобили.
Конкретно, продажбата во Франција, Италија и Шпанија забележа двоцифрен пораст, во споредба со 2022 година.
Производителите на автомобили се соочуваат со краен рок до 2035 година, поставен од Европската унија за постепено укинување на продажбата на нови возила со мотори со согорување.
Продажбата на хибридни автомобили, исто така, порасна минатата година, зголемена за речиси 30 проценти.
Сепак, бензинските автомобили и понатаму останаа голем дел од пазарот на нови возила, со 35,3 отсто од продажбата низ цела Европа минатата година, што претставува 3,7 милиони автомобили.
Фолксваген остана на пол-позицијата меѓу производителите на автомобили, при што групата продаде 2,8 милиони нови автомобили во 2023 година, што е за 18 отсто повеќе во однос на претходната година.
