Полициски службеници од ОВР Гостивар утрово извршиле претрес во дом во гостиварското село Равен, при што биле пронајдени дрога и муниција, а едно лице е лишено од слобода.
Според информациите од МВР, денеска во 07:30 часот бил уапсен Д.С. (58) од село Равен, гостиварско, поради основано сомнение дека сторил кривично дело „неовластено производство и пуштање во промет на наркотични дроги, психотропни супстанции и прекурсори“.
Претресот во неговиот дом и помошните простории бил извршен врз основа на судска наредба.
При полициската акција биле пронајдени и одземени бела прашкаста материја, марихуана, како и куршуми за пиштол.
Педесет и осумгодишниот маж бил лишен од слобода и задржан во полициска станица.
Од МВР информираат дека по целосно документирање на случајот против него ќе биде поднесена соодветна пријава.
