Во последните 20 дена, бројот на заболени од коронавирус е значително зголемен, според грчките здравствени власти, а Националната јавна здравствена организација дистрибуира бесплатни тестови.
Тие упатија итно предупредување до туристите од Велика Британија кои одат во Грција токму поради ширењето на новиот вид на Ковид наречен „FLiRT“.
Предупредувањето беше издадено откако грчките власти забележаа зголемување на бројот на пациенти за 44 проценти, што ги натера болниците во Атина повторно да го воведат задолжителното носење заштитни маски. Некои болници, покрај задолжителното носење маски, воведоа и задолжително тестирање на посетителите.
Помеѓу 8 и 14 јули, 669 нови пациенти со коронавирус се примени во болниците во Грција. Во просек, во последните четири недели во болниците имало 464 пациенти. Истовремено, овој месец за една недела се регистрирани 26 смртни случаи, пишува Мирор.
Во предупредувањето до туристите се наведува дека оние кои се чувствителни на инфекции како коронавирусот, особено постарите, треба да бидат внимателни и брзо да реагираат на првите симптоми на инфекција. На здравите луѓе кои се сомневаат дека имаат корона се препорачува да избегнуваат контакт со ранливите категории за да се спречи ширење на вирусот.
