Такер Карлсон, поранешен водител на „Фокс Њуз„ пристигнал вчера во Москва и се шпекулира дека тој може да стане првиот западен новинар со шанса да го интервјуира Владимир Путин по руската инвазија на Украина, јави синоќа „Си-ен-ен“.
Телевизијата покажа снимки од руски новинари кои го следеле Карлсон по Москва, како тој се возел во московското метро, бил на претстава во Бољшој театар, како седи во луксузен ресторан или во својот хотел.
Тој постојано е цитиран во руските политички емисии како бранител на позициите на Москва со критики до Вашингтон и војната во Украина.
Според некои набљудувачи на состојбите, рускиот претседател бара начини да објави за намерата да се започнат преговори за регулирање на конфликтот во Украина.
Карлсон, кој беше еден од најпопуларните водители во десничарската телевизија „Фокс Њуз“ во декември започна стриминг емисија со претплата користејќи ја својата популарност меѓу конзервативните американски гласачи.
Интервјуто со поранешниот претседател на САД, Доналд Трамп, што тој го направи на социјалната мрежа „Х“ лани во август, беше прегледано од 267 милиони корисници.
