Една жена (51) и 14-годишно дете се повредени во експлозија утрово откако руски дрон погоди станбена зграда во романскиот град Галати.
Каталин Сион, портпарол на локалната противпожарна служба, потврди дека повредените биле во стан кој бил оштетен во експлозијата, објавува „Либертате“.
„Дронот удрил во покривот на зградата, а ударот предизвикал експлозија што го погодила станот подолу. Не го погодил директно станот, туку покривот. Во станот погоден од експлозијата имало две лица кои биле полесно повредени: 51-годишна жена и 14-годишно дете“, рече Сион.
Според него, жената и детето се евакуирале сами, а подоцна биле однесени во болница со полесни повреди и изгореници. Сион рече дека дронот експлодирал по ударот.
„Дронот се урна во станбена зграда, а по ударот следела експлозија и пожар во стан на десеттиот кат. Специјализирани тимови од ISU Галати и Романската разузнавачка служба (SRI) спроведуваат истрага. 70 лица се евакуирани, а нивното враќање во своите домови ќе биде одлучено по експертскиот извештај. Луѓето отишле да престојуваат кај роднини и пријатели, тие не побарале сместување што го нуди градот“, додаде портпаролот на противпожарната служба.
Градската администрација на Галати соопшти дека, доколку е потребно, е можно да се стави на располагање зграда со социјални станови за станарите на погодената зграда.
Властите објавија дека дронот се урна на покривот на зграда на улицата Браилеј во Галати, во близина на брегот на Дунав. По ударот, околу 70 лица биле евакуирани или самоевакуирани, а двајца добиле медицинска помош поради гребнатини.
Поради инцидентот, итно беа подигнати два авиона Ф-16 и еден воен хеликоптер IAR 330 SOCAT.
„Пилотите на авионот беа овластени да работат на цели во текот на целото времетраење на тревогата“, соопшти романското Министерство за одбрана (MApN). Властите, исто така, издадоа предупредувања за населението во окрузите Галати, Браила и Тулча.
Министерството за одбрана одбјави дека од почетокот на војната во Украина, фрагменти од беспилотни летала се пронајдени во 47 ситуации на романска територија, од кои 12 само оваа година. Според министерството, од почетокот на војната се регистрирани повеќе од 90 напади на украинска територија во близина на границата со Романија. Во 28 случаи е регистрирано навлегување на руски беспилотни летала во националниот воздушен простор.
Само оваа година се регистрирани 32 ситуации на напади во близина на границата, а во 23 случаи се подигнати авиони на воздушната полиција. „Во 15 ситуации, вклучувајќи ја и денешната, се регистрирани неовластени упади на беспилотни летала во националниот воздушен простор. Во 12 ситуации се пронајдени фрагменти од беспилотни летала на територијата на Романија“, наведува Министерството за одбрана.
