Поранешен германски офицер (66) е осуден за долгогодишно шпионирање за руската разузнавачка служба и доби условна казна од една година и девет месеци, пишува АП.
Државниот суд во Дизелдорф утврди дека обвинетиот бил во контакт со неколку високи вработени во канцеларијата на военото аташе во руската амбасада во Берлин, кои исто така работеле за руската воена разузнавачка служба ГРУ најдоцна од октомври 2014 година. Мажот бил идентификуван само како Ралф Г.
Судот рече дека на своите руски контакти им доставил информации за германските воени резерви, како и публикации за американската безбедносна и одбранбена политика, документи за ефектот на руските санкции наметнати во 2014 година врз Германија и линк до работен документ за сега суспендираниот Проект за гасовод „Северен тек“ 2.
Освен што бил офицер, осомничениот бил и член на германски деловни одбори. Судиите утврдија дека тој е мотивиран од неговите проруски ставови, како и од желбата да биде интересен за неговите руски воени контакти.
Исто така, судиите заклучија дека 66-годишникот сака да ја зајакне својата репутација на „експерт за безбедност“. Човекот добил покани за настани во руската амбасада во Берлин и за годишна безбедносна конференција во Москва.
Судот во својата одлука зел предвид и други фактори, вклучувајќи го и фактот дека речиси сите информации што ги дал биле јавно достапни.
Меѓутоа, судот го зел предвид и фактот дека дејствијата на мажот траеле повеќе од четири години, пренесе Индекс.хр.
