Шестгодишно девојче вчера почина во Клиничката болница Битола додека примало инфузија. Директорот на болницата Александар Обедниковски за „Макфакс“ вели дека девојчето било во нивната болница само неколку часа.
„Девојчето е донесено во болницата во 10 часот вчераутро, а почина во 14 часот. Родителите го донесоа дехидрирано, со покачена температура, повраќање и оток на очите. Кај нас беше само рехидрирано пред да почине. Телото сега е на обдукција, за случајот го известив Обвинителството“, рече директорот Обедниковски.
Според кажувањата на родителите, детето претходните два – три дена примало некаква терапија, но директорот Обедниковски вели дека тие како болница имаат пристап само до мерките што ги преземале специјалистите кај нив во болницата, а за сето останато ќе почекаат да заврши истрагата која е во тек.
