На 63-годишна возраст почина штипскиот бизнисмен Ване Богдов.
Богдов кај јавноста беше запаметен како бизнисмен кој на почетокот на минатата година својата конфекција „Вабо“ им ја предаде на управување на вработените.
На работниците им ја даде на користење фабриката со целата опрема во неа, при што, како што тогаш најави, во првата година нема да плаќаат никаков надомест за тоа, а од втората година, само под услов фабриката да работи со добивка, ќе наплаќа минимална кирија.
Тој синоќа околку 21 часот бил на прошетка на Пешачкиот мост во Штип каде доживеал срцев удар. Според написи на локални медиуми, студент по медицина успеал да го реанимира, по што веднаш бил префрлен во Клиничката болница во Штип, но за жал не преживеал.
Неговите сограѓани ќе го паметат како голем хуманист, а на градот под Исарот му ја остави и уникатната црква „Свети Константин и Елена“.
