Министерката за одбрана Славјанка Петровска и претседателот на Независниот синдикат на одбраната, Ванчо Исајов, денеска во Министерството за обрана го потпишаа новиот Колективен договор за вработените во одбраната и припадниците на Армијата.
Со овој Колективен договор, значително се унапредува стандардот на вработените во одбраната и целосно се вреднува трудот на вработените кои се исклучително значајна алка во одбранбениот систем.
„Драго ми е што после период на разговори и усогласување, денеска новиот Колективен договор за вработените во одбраната и Армијата стана реалност. Со тоа исправаме една неправда кон вработените во одбраната кои се навистина значаен дел од нашиот систем. Го зголемуваме нивниот стандард и ги мотивираме да продолжат да бидат професионалци чие знаење и искуство помогна Северна Македонија да стане полноправна членка на Алијансата“, рече министерката.
Петровска се заблагодари на репрезентативниот синдикат во одбраната, како и на останатите синдикати за посветеноста и отвореноста во разговорите кои доведоа до потпишување на овој Колективен договор.
Една од одредбите на новиот Колективен договор е исплатата на надоместок за закупнина за сите вработени во одбраната, надоместокот од 100% при боледување за сите вработени во Министерството, вреднување на степенот на образование, исплата на испратнина при пензионирање во висина од 15 плати и друго.
